الأحد، 11 أبريل 2010

ثوبين وشماغ وطاقيه وعقال يا محسنين !

بسم الله الرحمن الرحيم
أسعد الله أوقاتكم بكل خير


أول شيء بقول شغلة مهمة .. أنا خصيت أصحاب رؤوس الأموال و التجار لأني أؤمن بدورهم في المجتمع و أثق برجالات الأموال في بلدي ثقة عمياء و أعرف إنه الحاجز الي بيننا و بينهم خيط رفيع هو ضعاف النفوس الي شكلوا عائق بينهم و بين انهم يقدمون مساعداتهم للشباب السعودي سواء كان في التوظيف أو المساعدات الماديه و المعنويه أو حتى في تقديم القروض .. و ضعاف النفوس هذولا هم الي خربوا على أصحاب النوايا السليمه الصادقه الذين احتسب نفسي منهم إن شاء الله في تحسينهم مستواهم و حرصهم على إنهم يكون لهم دور فعال في المجتمع و حرصهم أيضاً على إنه يكون لهم يد في خدمة دينهم ووطنهم و تحسين مستواهم و سعيهم للاستقرار النفسي و الوظيفي والعائلي ..
لذلك أنا لا أعتب عليهم أبداً ..
بل ألتمس العذر لهم ..

عشان أكون صادق معكم و واقعي أكلمكم عن نفسي كشاب سعودي إشتعل قلبه شيباً و هو في عز الشباب .. كنت في الأول أدور وظيفة و أحط رجل على رجل و أدور راتب مدير .. قالوا لي طلبك بسيط لكن بشرط تجيب شهادة جامعيه و خبرات عملية و خلافه .. قلت ليش لا ؟ بس أنا إمكانياتي الأن ضعيفة و أضطريت إني أوقف عند الثانوية لأن نسبتي ما ساعدتني على تكملة الجامعه ..
بعدها بديت أفكر و أقول لنفسي شلون تبغى منصب و إنت ما عندك الا ثانوية .. و آمنت إنه هذا نصيبي و إني لازم أقطع مشوار طويل عشان أوصل لهذا المنصب مثلي مثل غيري من الناس ..

جلست فترة طويلة أدور على وظيفة .. أقسم لكم بالله العظيم إني كنت أصحى الصبح ألبس شماغي وثوبي وأمشي بالشوارع على رجولي لأني ما أملك سياره .. كنت أمشي ادور أي وظيفة بصرف النظر عن ماهيتها و عن وضعها و راتبها و بصرف النظر حتى عن مواعيد دوامها .. لكن للأسف ما لقيت ..

كنت خلال بحثي عن وظيفة بنفس الوقت كنت أبحث عن أحد يسلفني مادياً .. كنت أدور على قرض و أحس إن هذا حق من حقوقي لأني مو موظف بالتالي أحتاج أصرف على نفسي مبدئياً ..
قالوا لي لازم تتوظف عشان تقدر تأخذ قرض .. ما أحد راح يعطيك من الباب للطاقة ..
قلنا حاضرين ..
وإستمريت بالبحث ..
وإستمريت ..
وجلست فترة طويلة ..

و أبشركم ما لقيت وظيفة إلا يوم الإثنين الي راح في أحد البنوك .. وظيفة محترمة و مرموقه و راتبها رائع جداً بالنسبة لي أنا متأكد ألف واحد يحلم فيها و يتمناها .. وظيفة فيها تطور وظيفي و تحسين وضع رائع .. لا و أزيدكم من الشعر بيت و أبشركم .. تأكدت من نزاهتها شرعياً و سلامتها من الربا اليوم الحمد لله والشكر ..

سويت المقابلة الشخصية و إنقبلت .. و أقسم لكم سووا لنا إختبار أمس أنا جبت أعلى درجة فيه بين الموظفين .. و هي 99 من 99 .. يعني الدرجة الكامله ..

حسيت إني كبرت قدام عيني و قدام نفسي .. و بعين الناس .. و بدت أحلامي تكبر معي .. لكن إنصدمت بأكثر من شيء :

أولاً : إني ما أملك ولا ريال
ثانياً : ما أملك سياره ( و عملي يعتمد على الميدان )
ثالثاً : ثيابي قديمه جداً .. شماغي قديم .. بنفس الوقت الي فيه كل زملائي كاشخين و مفصلين ثياب و مرسمين ..
لا أحد يجيني يقول إني أهتم بالشكليات .. لكن اكيد نظرتهم لي بتكون مش و لابد و خصوصا ادارة البنك لأني واجهة لهم و للبنك .. لذلك هم حريصين ان شكلي يكون مرتب ..


فكرت أبحث عن قرض .. قالوا لازم يكون راتبك ينزل في بنك ولازم استقطاع .. و انا بفترة تجربة و راتبي أخذه شيك .. يعني ما في أمل البنك يعطيني قرض ..
قالوا الناس نخاف نسلفك تكون لعاب و ما ترجع الفلوس ..
قلت أقسم بالله العظيم إني صادق بترجيع المبلغ أفساط من راتبي ..
وللأسف ما لقيت مسعف ..

الأن أنا أستلم راتبي بتاريخ 30 ميلادي يعني باقي تقريباً 20 يوم .. ما عاد أبغى قرض .. لكن مسألة إني أصل لمرحلة أطلب من اهل الخير إنهم يجون معي لمحل تفصيل الثياب يتبرعون لي بتفصيل ثوبين بعدين نروح لمحل ملابس رجالية اشتري شماغ و طاقية وعقال ..
وبعد ما يرضون !
أعتقد بل أكاد أجزم إن هذي مصيبة ! و كارثه !

الأن أنا يأست ألقى قرض أو سلف أمشي نفسي فيه الين اخر الشهر و لا عاد أبغى فلوس و لا شي
إلا شيء واحد ..
أبي رجال طيب و مقتدر يساعدني .. أقابله و أتشرف بمعرفته و نروح لمحل تفصيل ثياب افصل ثوبين و اروح اشتري شماغ وطاقيه و عقال .. وما أبيها هديه .. برجع له حقها من يوم يطلع الراتب على أقساط .. ما أبغى فلوس .. أبي ثوبين وشماغ وطاقيه و عقال و أدعي لك ! http://bit.ly/a5HoR6

ليست هناك تعليقات:

إرسال تعليق